Акафист божией матери иконе нечаянная радость: Акафист Пресвятой Богородице пред иконой «Нечаянная Радость» — Акафистник

Содержание

Акафист Пресвятой Богородице пред иконой «Нечаянная Радость» — Акафистник

А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ неча́ѧннаѧ ра́дость.

Конда́къ а҃.

И҆збра́ннѣй ѿ всѣ́хъ родѡ́въ бж҃їей мт҃ри и҆ цр҃и́це, ꙗ҆ви́вшейсѧ и҆ногда̀ къ чл҃вѣ́кꙋ беззако́ннꙋ, во є҆́же ѿврати́ти є҆го̀ ѿ пꙋтѝ нече́стїѧ, бл҃года́рственное пѣ́нїе прино́симъ тѝ, бг҃ороди́тельнице: ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѿ всѧ́кихъ на́съ бѣ́дъ и҆ грѣхѡ́въ свободѝ, да зове́мъ тѝ:

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

І҆́косъ а҃.

А҆́гг҃ли и҆ првⷣныхъ дꙋ́ши ᲂу҆диви́шасѧ, є҆гда̀ предста́ла є҆сѝ пред̾ сн҃омъ твои́мъ и҆ бг҃омъ и҆ мно́гимъ моле́нїемъ хода́тайствовала є҆сѝ ѡ҆ человѣ́цѣ, при́снѡ во грѣсѣ́хъ пребыва́ющемъ: мы́ же, ѻ҆чи́ма вѣ́ры толи́кое твоѐ бл҃гоꙋтро́бїе зрѧ́ще, со ᲂу҆миле́нїемъ взыва́емъ тѝ си́це:

Ра́дꙋйсѧ, мл҃твы всѣ́хъ хрⷭ҇тїа́нъ прїе́млющаѧ: ра́дꙋйсѧ, и҆ са́мыхъ ѿча́ѧнныхъ грѣ́шникѡвъ молє́нїѧ не ѿверга́ющаѧ.

Ра́дꙋйсѧ, къ сн҃ꙋ твоемꙋ̀ ѡ҆ ни́хъ предста́тельствꙋющаѧ: ра́дꙋйсѧ, неча́ѧннꙋю ра́дость сп҃се́нїѧ и҆́мъ подаю́щаѧ.

Ра́дꙋйсѧ, предста́тельствомъ твои́мъ ве́сь мі́ръ сп҃са́ющаѧ: ра́дꙋйсѧ, всѧ̑ на́шѧ печа̑ли ᲂу҆толѧ́ющаѧ.

Ра́дꙋйсѧ, мт҃и всѣ́хъ бг҃а, ѡ҆ѕло́бленныхъ дꙋ́шы ᲂу҆тѣша́ющаѧ: ра́дꙋйсѧ, житїѐ на́ше до́брѣ ᲂу҆строѧ́ющаѧ.

Ра́дꙋйсѧ, и҆збавле́нїе ѿ грѣхѡ́въ всѣ́мъ чл҃вѣ́кѡмъ прине́сшаѧ: ра́дꙋйсѧ, ра́дость всемꙋ̀ мі́рꙋ роди́вшаѧ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ в҃.

Ви́дѧщи прест҃а́ѧ чл҃вѣ́ка, а҆́ще и҆ беззако́нна, но на всѧ́къ де́нь съ вѣ́рою и҆ ᲂу҆пова́нїемъ пред̾ чтⷭ҇но́ю є҆ѧ̀ і҆кѡ́ною до́лꙋ поверга́ющагосѧ и҆ а҆рха́гг҃льское привѣ́тствїе є҆́й приносѧ́щаго, внѧ́тъ и҆ такова́гѡ грѣ́шника славосло́вїю, да всѝ, зрѧ́ще є҆ѧ̀ мт҃рнее млⷭ҇рдїе, на нб҃сѝ и҆ на землѝ вопїю́тъ бг҃ꙋ: А҆ллилꙋ́їа.

І҆́косъ в҃.

Ра́зꙋмъ чл҃вѣ́ческїй вои́стиннꙋ превосхо́дитъ любо́вь твоѧ̀ къ ро́дꙋ хрⷭ҇тїа́нскомꙋ, ꙗ҆́кѡ и҆ тогда̀ не преста́ла є҆сѝ ѿ хода́тайства твоегѡ̀ ѡ҆ человѣ́цѣ беззако́ннѣмъ, є҆гда̀ сн҃ъ тво́й показа̀ тебѣ̀ ꙗ҆́звы гвозди́ныѧ, грѣхи̑ человѣ́ческими є҆мꙋ̀ содѣ̑ѧнныѧ. Зрѧ́ще тѧ̀ толи́кѡ неѿстꙋ́пнꙋю предста́тельницꙋ за на́съ грѣ́шныхъ, со слеза́ми вопїе́мъ тѝ:

Ра́дꙋйсѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ, ѿ бг҃а на́мъ дарова́ннаѧ: ра́дꙋйсѧ, пꙋтеводи́тельнице на́ша, къ нбⷭ҇номꙋ ѻ҆те́чествꙋ на́съ возводѧ́щаѧ.

Ра́дꙋйсѧ, вѣ́рныхъ ѡ҆гражде́нїе и҆ прибѣ́жище: ра́дꙋйсѧ, по́моще всѣ́хъ, призыва́ющихъ и҆́мѧ твоѐ ст҃о́е.

Ра́дꙋйсѧ, всѣ́ми презрѣ́нныхъ и҆ ѿве́рженныхъ ѿ ро́ва поги́бели и҆схища́ющаѧ: ра́дꙋйсѧ, тѣ́хъ на пꙋ́ть пра́вый ѡ҆браща́ющаѧ.

Ра́дꙋйсѧ, непреста́нное ᲂу҆ны́нїе и҆ мра́къ дꙋше́вный ѿгонѧ́ющаѧ: ра́дꙋйсѧ, и҆жди́вшымъ ѿ недꙋ́га ᲂу҆́мъ но́вый и҆ лꙋ́чшїй смы́слъ подаю́щаѧ.

Ра́дꙋйсѧ, ѡ҆ста́вленныхъ врача́ми на своѝ всемѡ́щныѧ рꙋ́цѣ прїе́млющаѧ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ г҃.

Си́ла бл҃года́ти преиз̾ѡби́ловала та́мѡ, и҆дѣ́же ᲂу҆мно́жисѧ грѣ́хъ, да ра́дꙋютсѧ на нб҃сѝ всѝ а҆́гг҃ли ѡ҆ є҆ди́нѣмъ грѣ́шницѣ пока́ѧвшемсѧ, пою́ще пред̾ прⷭ҇то́ломъ бж҃їимъ: А҆ллилꙋ́їа.

І҆́косъ г҃.

И҆мꙋ́щи къ ро́дꙋ хрⷭ҇тїа́нскомꙋ мт҃рнее млⷭ҇рдїе, всѣ́мъ съ вѣ́рою и҆ ᲂу҆пова́нїемъ прибѣга́ющымъ къ тебѣ̀ подае́ши рꙋ́кꙋ по́мощи, влⷣчце, да всѝ є҆ди́нѣмъ се́рдцемъ и҆ є҆ди́ными ᲂу҆сты̑ славосло́вїе прино́сѧтъ тѝ сицево́е:

Ра́дꙋйсѧ, ꙗ҆́кѡ тобо́ю къ на́мъ нисхо́дитъ бж҃їе бл҃говоле́нїе: ра́дꙋйсѧ, ꙗ҆́кѡ тобо́ю и҆ мы̀ и҆́мамы вѧ́щшее къ бг҃ꙋ дерзнове́нїе.

Ра́дꙋйсѧ, ꙗ҆́кѡ во всѣ́хъ бѣда́хъ и҆ ѡ҆бстоѧ́нїихъ на́шихъ прино́сиши сн҃ꙋ твоемꙋ̀ ᲂу҆сє́рдныѧ ѡ҆ на́съ мл҃твы: ра́дꙋйсѧ, ꙗ҆́кѡ и҆ на́шѧ мл҃твы прїѧ́тными бг҃ꙋ содѣ́ловаеши.

Ра́дꙋйсѧ, ꙗ҆́кѡ неви́димыхъ врагѡ́въ ѿ на́съ ѿгонѧ́еши: ра́дꙋйсѧ, ꙗ҆́кѡ ѿ ви́димыхъ врагѡ́въ на́съ и҆збавлѧ́еши.

Ра́дꙋйсѧ, ꙗ҆́кѡ сєрдца̀ ѕлы́хъ чл҃вѣ̑къ ᲂу҆мѧгча́еши: ра́дꙋйсѧ, ꙗ҆́кѡ ѿ клеветы̀, досажде́нїѧ и҆ ᲂу҆коре́нїѧ на́съ и҆зыма́еши.

Ра́дꙋйсѧ, ꙗ҆́кѡ тобо́ю всѧ̑ бл҃га́ѧ жела́нїѧ на̑ша и҆сполнѧ́ютсѧ: ра́дꙋйсѧ, ꙗ҆́кѡ мно́гѡ мо́жетъ мл҃тва твоѧ̀ пред̾ сн҃омъ твои́мъ и҆ бг҃омъ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ д҃.

Бꙋ́рю внꙋ́трь и҆мѣ́ѧ грѣхо́вныхъ помышле́нїй, человѣ́къ беззако́ненъ молѧ́шесѧ пред̾ чⷭ҇тно́ю і҆кѡ́ною твое́ю и҆, ви́дѣвъ кро́вь ѿ ꙗ҆́звъ предвѣ́чнагѡ сн҃а твоегѡ̀ пото́ками, ꙗ҆́коже на крⷭ҇тѣ̀, текꙋ́щꙋю, падѐ ѿ стра́ха и҆ съ рыда́нїемъ та́кѡ вопїѧ́ше тѝ: поми́лꙋй мѧ̀, ѡ҆ мт҃и млⷭ҇рдїѧ, да не преѡдолѣ́етъ ѕло́ба моѧ̀ неизрече́нныѧ бл҃гости и҆ млⷭ҇рдїѧ твоегѡ̀, ты́ бо є҆сѝ всѣ̑мъ грѣ́шникѡмъ є҆ди́на наде́жда и҆ прибѣ́жище: преклони́сѧ ᲂу҆́бѡ на млⷭ҇ть, бл҃га́ѧ мт҃и, и҆ ᲂу҆молѝ ѡ҆ мнѣ̀ сн҃а твоегѡ̀ и҆ творца̀ моегѡ̀, да непреста́ннѡ зовꙋ̀ є҆мꙋ̀: А҆ллилꙋ́їа.

І҆́косъ д҃.

Слы́шавше нб҃ожи́тели ѡ҆ чꙋде́снѣмъ мл҃твами твои́ми сп҃се́нїи и҆̀хъ земна́гѡ ги́бнꙋщаго бра́та, просла́виша тѧ̀, бл҃госе́рдꙋю цр҃и́цꙋ нб҃сѐ и҆ землѝ: и҆ мы̀, грѣ́шнїи, свѣ́давше таково́е подо́бнагѡ на́мъ грѣ́шника застꙋпле́нїе, а҆́ще и҆ недоꙋмѣва́етъ ѧ҆зы́къ на́шъ восхвали́ти тѧ̀ по достоѧ́нїю, ѿ глꙋбины̀ ᲂу҆миле́ннагѡ се́рдца на́шегѡ воспѣва́емъ тѝ си́це:

Ра́дꙋйсѧ, спорꙋ́чнице сп҃се́нїѧ грѣ́шныхъ: ра́дꙋйсѧ, взыска́нїе поги́бшихъ.

Ра́дꙋйсѧ, неча́ѧннаѧ грѣ́шныхъ ра́досте: ра́дꙋйсѧ, па́дшихъ возста́нїе.

Ра́дꙋйсѧ, предста́тельнице къ бг҃ꙋ, мі́ръ ѿ бѣ́дъ сп҃са́ющаѧ: ра́дꙋйсѧ, ꙗ҆́кѡ гла́са мл҃твъ твои́хъ бѣ́си трепе́щꙋтъ.

Ра́дꙋйсѧ, ꙗ҆́кѡ а҆́гг҃ли семꙋ̀ ра́дꙋютсѧ: ра́дꙋйсѧ, ꙗ҆́кѡ и҆ на́съ, земноро́дныхъ, си́ла мл҃твъ твои́хъ весе́лїѧ и҆сполнѧ́етъ.

Ра́дꙋйсѧ, ꙗ҆́кѡ тѣ́ми ѿ ти́ны грѣхѡ́въ на́съ и҆зыма́еши: ра́дꙋйсѧ, ꙗ҆́кѡ пла́мень страсте́й на́шихъ ᲂу҆гаша́еши.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ є҃.

Бг҃оте́чнꙋю ѕвѣздꙋ̀, чꙋдотво́рнꙋю і҆кѡ́нꙋ мт҃ре твоеѧ̀ показа́лъ є҆сѝ на́мъ, гдⷭ҇и, и҆́бо, взира́юще на ѻ҆́бразъ є҆ѧ̀ тѣле́сныма ѻ҆чи́ма, ᲂу҆мо́мъ и҆ се́рдцемъ къ первоѻбра́знѣй возвыша́емсѧ и҆ є҆́ю къ тебѣ̀ востека́емъ, пою́ще: А҆ллилꙋ́їа.

І҆́косъ є҃.

Ви́дѣвше а҆́гг҃ли храни́тели хрⷭ҇тїа́нъ, ꙗ҆́кѡ бж҃їѧ мт҃рь споспѣшествꙋ́етъ и҆́мъ въ наставле́нїи тѣ́хъ, застꙋпле́нїи и҆ сп҃се́нїи, потща́шасѧ си́це возопи́ти чⷭ҇тнѣ́йшей херꙋві̑мъ и҆ сла́внѣйшей без̾ сравне́нїѧ серафі̑мъ:

Ра́дꙋйсѧ, съ сн҃омъ твои́мъ и҆ бг҃омъ вѣ́чнѡ црⷭ҇твꙋющаѧ: ра́дꙋйсѧ, є҆мꙋ̀ всегда̀ ѡ҆ ро́дѣ хрⷭ҇тїа́нстѣмъ молє́нїѧ приносѧ́щаѧ.

Ра́дꙋйсѧ, въ хрⷭ҇тїа́нстѣй вѣ́рѣ и҆ бл҃гоче́стїи наста́внице: ра́дꙋйсѧ, є҆ресе́й и҆ тлетво́рныхъ раско́лѡвъ и҆скорени́тельнице.

Ра́дꙋйсѧ, ѿ растлѣва́ющихъ дꙋ́шꙋ и҆ тѣ́ло собла́знѡвъ сохранѧ́ющаѧ: ра́дꙋйсѧ, ѿ ѻ҆па́сныхъ ѡ҆бстоѧ́нїй и҆ внеза́пныѧ сме́рти, без̾ покаѧ́нїѧ и҆ ст҃а́гѡ причаще́нїѧ, и҆збавлѧ́ющаѧ.

Ра́дꙋйсѧ, ᲂу҆пова́ющымъ на тѧ̀ живота̀ непосты́дный коне́цъ да́рꙋющаѧ: ра́дꙋйсѧ, и҆ по сме́рти за ѿше́дшꙋю на сꙋ́дъ гдⷭ҇ень дꙋ́шꙋ пред̾ сн҃омъ твои́мъ неѿстꙋ́пнѡ хода́тайствꙋющаѧ.

Ра́дꙋйсѧ, твои́мъ мт҃рнимъ предста́тельствомъ ѿ вѣ́чнагѡ мꙋче́нїѧ сїю̀ и҆збавлѧ́ющаѧ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ ѕ҃.

Проповѣ́дникъ чꙋ́днагѡ твоегѡ̀ млⷭ҇рдїѧ, дарова́ннагѡ нѣ́коемꙋ человѣ́кꙋ беззако́ннꙋ, ꙗ҆ви́сѧ ст҃ы́й дими́трїй росто́вскїй, и҆́же, списꙋ́ѧ вели̑каѧ и҆ сла̑внаѧ и҆ и҆зрѧ̑днаѧ дѣла̀ бж҃їѧ, въ тебѣ̀ ꙗ҆вле́ннаѧ, предадѐ пи́сьмени и҆ сїѐ дѣ́ло млⷭ҇ти твоеѧ̀ въ наꙋче́нїе и҆ ᲂу҆тѣше́нїе всѣ́мъ вѣ́рнымъ, да и҆ ті́и, во грѣсѣ́хъ, бѣда́хъ, ско́рбехъ и҆ ѡ҆ѕлобле́нїихъ сꙋ́ще, мно́гажды на всѧ́къ де́нь съ вѣ́рою въ мл҃твѣ пред̾ ѻ҆́бразомъ твои́мъ колѣ̑на преклонѧ́ютъ и҆, тѣ́хъ и҆збы́вше, вопїю́тъ бг҃ꙋ: А҆ллилꙋ́їа.

І҆́косъ ѕ҃.

Возсїѧ̀ на́мъ, ꙗ҆́кѡ пресвѣ́тлаѧ зарѧ̀, чꙋдотво́рнаѧ і҆кѡ́на твоѧ̀, бг҃омт҃и, прогонѧ́ѧ тмꙋ̀ бѣ́дъ и҆ скорбе́й ѿ всѣ́хъ, съ любо́вїю вопїю́щихъ тѝ си́це:

Ра́дꙋйсѧ, цѣли́тельнице на́ша въ болѣ́знехъ тѣле́сныхъ: ра́дꙋйсѧ, бл҃га́ѧ ᲂу҆тѣ́шительнице въ печа́лехъ на́шихъ дꙋше́вныхъ.

Ра́дꙋйсѧ, ско́рбь на́шꙋ въ ра́дость претворѧ́ющаѧ: ра́дꙋйсѧ, ненадѣ́ющихсѧ несꙋмне́нною наде́ждою возвеселѧ́ющаѧ.

Ра́дꙋйсѧ, а҆́лчꙋщихъ пита́тельнице: ра́дꙋйсѧ, наги́хъ ѡ҆дѣѧ́нїе.

Ра́дꙋйсѧ, вдѡ́въ ᲂу҆тѣ́шительнице: ра́дꙋйсѧ, безма́тернихъ сирѡ́тъ незри́маѧ воспита́тельнице.

Ра́дꙋйсѧ, непра́веднѡ гони́мыхъ и҆ ѡ҆би́димыхъ застꙋ́пнице: ра́дꙋйсѧ, гонѧ́щихъ и҆ ѡ҆би́дѧщихъ правосꙋ́днаѧ ѿмсти́тельнице.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ з҃.

Хотѧ̀ законода́вецъ правосꙋ́дный гдⷭ҇ь са́мъ бы́ти зако́на и҆сполни́тель и҆ ꙗ҆ви́ти млⷭ҇рдїѧ своегѡ̀ бе́зднꙋ, преклони́сѧ на ᲂу҆се́рдное моле́нїе твоѐ, пребл҃гослове́ннаѧ мт҃и дв҃о, ѡ҆ человѣ́цѣ беззако́нне, глаго́лѧ: зако́нъ повелѣва́етъ, да сн҃ъ чти́тъ мт҃рь. А҆́зъ сн҃ъ тво́й, ты́ же мт҃и моѧ̀: а҆́зъ тѧ̀ до́лженъ чти́ти, послꙋ́шаѧ твоегѡ̀ моле́нїѧ: бꙋ́ди ᲂу҆́бѡ, ꙗ҆́коже хо́щеши: ны́нѣ проща́ютсѧ є҆мꙋ̀ грѣсѝ тебє̀ ра́ди. Мы́ же, ви́дѧще таковꙋ́ю си́лꙋ мл҃твы хода́таицы на́шей ѡ҆ проще́нїи согрѣшє́нїй на́шихъ, просла́вимъ млⷭ҇рдїе и҆ неизрече́нное бл҃гоꙋтро́бїе є҆ѧ̀, зовꙋ́ще: А҆ллилꙋ́їа.

І҆́косъ з҃.

Но́вое ди́вное и҆ сла́вное зна́менїе всѣ́мъ вѣ́рнымъ ꙗ҆ви́сѧ, ꙗ҆́кѡ не то́кмѡ мт҃ри твое́й, но и҆ пречⷭ҇томꙋ є҆ѧ̀ ли́кꙋ, на дскѣ̀ и҆зѡбраже́нномꙋ, си́лꙋ чꙋдотворе́нїѧ дарова́лъ є҆сѝ, гдⷭ҇и: семꙋ̀ та́инствꙋ дивѧ́щесѧ, во ᲂу҆миле́нїи се́рдца вопїе́мъ къ не́й такова̑ѧ:

Ра́дꙋйсѧ, премꙋ́дрости и҆ бл҃гости бж҃їѧ ѿкрове́нїе: ра́дꙋйсѧ, вѣ́ры ᲂу҆твержде́нїе.

Ра́дꙋйсѧ, бл҃года́ти ꙗ҆вле́нїе: ра́дꙋйсѧ, дꙋшеполе́зныхъ зна́нїй дарова́нїе.

Ра́дꙋйсѧ, дꙋшевре́дныхъ ᲂу҆че́нїй низложе́нїе: ра́дꙋйсѧ, беззако́нныхъ на́выкѡвъ нетрꙋ́дное преѡдолѣ́нїе.

Ра́дꙋйсѧ, сло́во премꙋ́дрости просѧ́щымъ да́рꙋющаѧ: ра́дꙋйсѧ, несмы́сленныхъ разꙋ́мныѧ содѣ́ловающаѧ.

Ра́дꙋйсѧ, дѣ́темъ, неꙋдо́бь ᲂу҆ча́щымсѧ, ра́зꙋмъ подаю́щаѧ: ра́дꙋйсѧ, ю҆́ности бл҃га́ѧ ѡ҆храни́тельнице и҆ наста́внице.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ и҃.

Стра́нное и҆ ᲂу҆жа́сное видѣ́нїе бы́сть нѣ́коемꙋ человѣ́кꙋ беззако́ннꙋ, показꙋ́ѧ є҆мꙋ̀ бл҃гость гдⷭ҇ню, предста́тельствомъ бг҃омт҃ре грѣхѝ є҆гѡ̀ проща́ющꙋю: сегѡ̀ ра́ди ѿто́лѣ, и҆спра́вль своѐ житїѐ, поживѐ бг҃оꙋго́днѣ. Си́це и҆ мы̀, сла̑внаѧ дѣла̀ и҆ многоразли́чнꙋю премꙋ́дрость бж҃їю въ мі́рѣ и҆ жи́зни на́шей ви́дѧще, ᲂу҆страни́мсѧ земны́ѧ сꙋеты̀ и҆ и҆зли́шнихъ жите́йскихъ попече́нїй и҆ ᲂу҆́мъ и҆ се́рдце на́ше на нб҃са̀ возведе́мъ, пою́ще бг҃ꙋ: А҆ллилꙋ́їа.

І҆́косъ и҃.

Всѧ̀ въ вы́шнихъ пребыва́ющи, и҆ ни́жнихъ ника́коже ѿстꙋпи́ла є҆сѝ, премлⷭ҇рдаѧ цр҃и́це нб҃сѐ и҆ землѝ: а҆́ще бо по ᲂу҆спе́нїи твое́мъ и҆ взошла̀ на нб҃са̀ съ пречⷭ҇тою твое́ю пло́тїю, ѻ҆ба́че и҆ грѣ̑шныѧ землѝ не ѡ҆ста́вила є҆сѝ, ꙗ҆влѧ́ющисѧ прича́стница промышле́нїѧ сн҃а твоегѡ̀ ѡ҆ ро́дѣ хрⷭ҇тїа́нстѣмъ. Сегѡ̀ ра́ди тѧ̀ по до́лгꙋ ᲂу҆бл҃жа́емъ:

Ра́дꙋйсѧ, сїѧ́нїемъ пречⷭ҇тыѧ дꙋшѝ твоеѧ̀ всю̀ зе́млю просвѣти́вшаѧ: ра́дꙋйсѧ, чⷭ҇тото́ю тѣлесѐ твоегѡ̀ всѧ̑ нб҃са̀ возвесели́вшаѧ.

Ра́дꙋйсѧ, промышле́нїѧ сн҃а твоегѡ̀ ѡ҆ ро́дѣ хрⷭ҇тїа́нстѣмъ ст҃а́ѧ слꙋжи́тельнице: ра́дꙋйсѧ, ѡ҆ всѣ́мъ мі́рѣ ᲂу҆се́рднаѧ предста́тельнице.

Ра́дꙋйсѧ, всѣ́хъ на́съ при крⷭ҇тѣ̀ сн҃а твоегѡ̀ ᲂу҆сн҃ови́вшаѧ: ра́дꙋйсѧ, всегда̀ мт҃рнюю любо́вь къ на́мъ ꙗ҆влѧ́ющаѧ.

Ра́дꙋйсѧ, всѣ́хъ дарѡ́въ, дꙋхо́вныхъ и҆ тѣле́сныхъ, незави́стнаѧ пода́тельнице: ра́дꙋйсѧ, бл҃гъ вре́менныхъ хода́таице.

Ра́дꙋйсѧ, двє́ри црⷭ҇твїѧ хрⷭ҇то́ва вѣ́рнымъ ѿверза́ющаѧ: ра́дꙋйсѧ, и҆ на землѝ чи́стагѡ весе́лїѧ сердца̀ и҆̀хъ и҆сполнѧ́ющаѧ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ ѳ҃.

Всѧ́кое є҆стество̀ а҆́гг҃льское ᲂу҆диви́сѧ дѣ́лꙋ твоегѡ̀ млⷭ҇рдїѧ, гдⷭ҇и, ꙗ҆́кѡ дарова́лъ є҆сѝ толи́ко тве́рдꙋю и҆ те́плꙋю застꙋ́пницꙋ и҆ помо́щницꙋ ро́дꙋ хрⷭ҇тїа́нскомꙋ, на́мъ неви́димѡ спребыва́ющꙋ, слы́шащꙋ же тебѐ пою́щихъ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи, но не бг҃опросвѣще́ннїи сꙋесло́вѧтъ, ꙗ҆́кѡ поклоне́нїе ст҃о́мꙋ ѻ҆́бразꙋ а҆́ки бы поклоне́нїе і҆́дѡлꙋ є҆́сть: не разꙋмѣ́ютъ бо, ꙗ҆́кѡ че́сть, ст҃о́мꙋ ѻ҆́бразꙋ воздава́емаѧ, на первоѡбра́знаѧ восхо́дитъ. Мы́ же не то́кмѡ сїѧ̀ до́брѣ вѣ́дꙋще, но и҆ ѿ вѣ́рныхъ чл҃вѣ̑къ ѡ҆ мно́гихъ чꙋдотворє́нїихъ ѿ ли́ка бг҃омт҃ре слы́шаще, и҆ са́ми поклоне́нїемъ є҆мꙋ̀ потрє́бнаѧ ко вре́меннѣй и҆ вѣ́чнѣй жи́зни прїе́млюще, съ весе́лїемъ бцⷣѣ взыва́емъ:

Ра́дꙋйсѧ, ꙗ҆́кѡ ѿ сщ҃е́ннагѡ ли́ка твоегѡ̀ чꙋдеса̀ дѣ́ютсѧ: ра́дꙋйсѧ, ꙗ҆́кѡ ᲂу҆таи́сѧ премꙋ́дрость и҆ бл҃года́ть сїѧ̀ ѿ мꙋ́дрыхъ и҆ разꙋ́мныхъ вѣ́ка сегѡ̀.

Ра́дꙋйсѧ, ꙗ҆́кѡ ѿкры́сѧ та̀ младе́нцємъ въ вѣ́рѣ: ра́дꙋйсѧ, ꙗ҆́кѡ прославлѧ́ющихъ тѧ̀ прославлѧ́еши.

Ра́дꙋйсѧ, ꙗ҆́кѡ ѿверга́ющихъ тѧ̀ пред̾ всѣ́ми посрамлѧ́еши: ра́дꙋйсѧ, ꙗ҆́кѡ ѿ потопле́нїѧ, ѻ҆гнѧ̀ и҆ меча̀, ѿ смертоно́сныѧ ꙗ҆́звы и҆ ѿ всѧ́кагѡ ѕла̀ прибѣга́ющихъ къ тебѣ̀ и҆збавлѧ́еши.

Ра́дꙋйсѧ, ꙗ҆́кѡ всѧ̑ болѣ̑зни человѣ́честїи, дꙋшє́вныѧ и҆ тѣлє́сныѧ, млⷭ҇тивнѡ врачꙋ́еши: ра́дꙋйсѧ, ꙗ҆́кѡ првⷣный гнѣ́въ бж҃їй на на́съ твои́мъ моле́нїемъ ско́рѡ ᲂу҆толѧ́еши.

Ра́дꙋйсѧ, ꙗ҆́кѡ ты̀ є҆сѝ ти́хое приста́нище ѿ бꙋ́рь пла́вающымъ по мо́рю жите́йскомꙋ: ра́дꙋйсѧ, ꙗ҆́кѡ и҆ по концѣ̀ жите́йскагѡ пла́ванїѧ на́шегѡ наде́жнѡ приво́диши на́съ въ неѡбꙋрева́емꙋю странꙋ̀ црⷭ҇твїѧ хрⷭ҇то́ва.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ і҃.

Сп҃стѝ хотѧ̀ человѣ́ка нѣ́коегѡ беззако́нна ѿ заблꙋжде́нїѧ жи́зненнагѡ пꙋтѝ є҆гѡ̀, ди́вное видѣ́нїе ѿ пречⷭ҇тны́ѧ і҆кѡ́ны твоеѧ̀ показа́ла є҆сѝ є҆мꙋ̀, пребл҃гослове́ннаѧ, да чꙋ́до ви́дѧ, пока́етсѧ и҆, и҆з̾ глꙋбины̀ грѣхо́вныѧ млⷭ҇рдымъ промышле́нїемъ твои́мъ воздви́гнꙋтый, вопїе́тъ бг҃ꙋ: А҆ллилꙋ́їа.

І҆́косъ і҃.

Стѣна̀ є҆сѝ дѣ́вамъ, бцⷣе дв҃о, и҆ всѣ́мъ къ тебѣ̀ притека́ющымъ, и҆́бо нб҃сѐ и҆ землѝ творе́цъ, всели́выйсѧ во ᲂу҆тро́бꙋ твою̀ и҆ ѿ тебє̀ роди́выйсѧ, ꙗ҆ви́ тѧ, приснодв҃ꙋ, стра́жа дѣ́вства, чⷭ҇тоты̀ и҆ цѣломꙋ́дрїѧ и҆ сосꙋ́дъ всѧ́кїѧ добродѣ́тели, и҆ всѣ́хъ возглаша́ти тебѣ̀ наꙋчѝ:

Ра́дꙋйсѧ, сто́лпе и҆ ѡ҆гражде́нїе дѣ́вства: ра́дꙋйсѧ, чⷭ҇тоты̀ и҆ цѣломꙋ́дрїѧ незри́маѧ ѡ҆храни́тельнице.

Ра́дꙋйсѧ, до́браѧ дѣ́вамъ наста́внице: ра́дꙋйсѧ, невѣ́стъ бл҃га́ѧ ᲂу҆краси́тельнице и҆ спорꙋ́чнице.

Ра́дꙋйсѧ, всежела́нное соверше́нїе бл҃ги́хъ сꙋпрꙋ́жествъ: ра́дꙋйсѧ, ма́терей дѣтородѧ́щихъ ско́рое разрѣше́нїе.

Ра́дꙋйсѧ, младе́нцєвъ воспита́нїе и҆ бл҃года́тное ѡ҆хране́нїе: ра́дꙋйсѧ, безча́дныхъ роди́телей плода́ми вѣ́ры и҆ дх҃а веселѧ́щаѧ.

Ра́дꙋйсѧ, ма́терей скорбѧ́щихъ ᲂу҆тѣше́нїе: ра́дꙋйсѧ, та́йное весе́лїе чⷭ҇тыхъ дѣ́въ и҆ вдови́цъ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ а҃і.

Пѣ́нїе всеꙋмиле́нное приносѧ́ще тѝ, недосто́йнїи, про́симъ тебѐ, дв҃о бцⷣе: не пре́зри гла́са рабѡ́въ твои́хъ: къ тебѣ́ бо въ напа́стехъ и҆ ско́рбехъ прибѣга́емъ и҆ пред̾ тобо́ю въ бѣда́хъ на́шихъ сле́зы пролива́емъ, пою́ще: А҆ллилꙋ́їа.

І҆́косъ а҃і.

Свѣтопода́тельнꙋю свѣщꙋ̀, сꙋ́щымъ во тьмѣ̀ грѣха̀ и҆ ю҆до́ли пла́ча ꙗ҆ви́вшꙋюсѧ, зри́мъ ст҃ꙋ́ю дв҃ꙋ: дх҃о́вный бо ѻ҆́гнь мл҃твъ свои́хъ, наставле́нїѧ и҆ ᲂу҆тѣше́нїѧ возжига́ющи, приво́дитъ къ свѣ́тꙋ невече́рнемꙋ всѣ́хъ, воззва̑нїи почита́ющихъ ю҆̀ си́ми:

Ра́дꙋйсѧ, лꙋчѐ ѿ со́лнца пра́вды хрⷭ҇та̀ бг҃а на́шегѡ: ра́дꙋйсѧ, нечи́стꙋю со́вѣсть просвѣща́ющаѧ.

Ра́дꙋйсѧ, та́йнаѧ и҆ неꙋдо́бь предви́дѣннаѧ всѧ̑ до́брѣ вѣ́дꙋщаѧ и҆ и҆́мже подоба́етъ сказꙋ́ющаѧ: ра́дꙋйсѧ, лжи́выхъ прови́дцєвъ и҆ сꙋ́єтнаѧ гада́нїѧ посрамлѧ́ющаѧ.

Ра́дꙋйсѧ, въ ча́съ недоꙋмѣ́нїй мы́сль бл҃гꙋ на се́рдце полага́ющаѧ: ра́дꙋйсѧ, въ постѣ̀, мл҃твѣ и҆ бг҃омы́слїи пребыва́ющымъ при́снѡ спребыва́ющаѧ.

Ра́дꙋйсѧ, вѣ́рныхъ па́стырєй цр҃кве ѡ҆бодрѧ́ющаѧ и҆ вразꙋмлѧ́ющаѧ: ра́дꙋйсѧ, бг҃обоѧ́зненныхъ и҆́нокѡвъ и҆ и҆́нокинь при́сное ᲂу҆тѣше́нїе.

Ра́дꙋйсѧ, ка́ющихсѧ пред̾ бг҃омъ грѣ́шникѡвъ непосты́днаѧ застꙋ́пнице: ра́дꙋйсѧ, всѣ́хъ хрⷭ҇тїа́нъ те́плаѧ хода́таице.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ в҃і.

Бл҃года́ть бж҃е́ственнꙋю и҆спросѝ на́мъ ᲂу҆ сн҃а твоегѡ̀ и҆ бг҃а, прострѝ на́мъ рꙋ́кꙋ по́мощи, ѿженѝ ѿ на́съ всѧ́кагѡ врага̀ и҆ сꙋпоста́та, ᲂу҆мирѝ на́шꙋ жи́знь, да не поги́бнемъ лю́тѣ, без̾ покаѧ́нїѧ, но прїимѝ на́съ въ вѣ̑чныѧ кро́вы, бг҃ороди́тельнице, да ра́дꙋющесѧ пое́мъ бг҃ꙋ, тобо́ю на́съ сп҃са́ющемꙋ: А҆ллилꙋ́їа.

І҆́косъ в҃і.

Пою́ще неизрече́нное мт҃рнее твоѐ млⷭ҇рдїе къ человѣ́кꙋ беззако́ннꙋ, восхвалѧ́емъ тѧ̀ всѝ, ꙗ҆́кѡ тве́рдꙋю предста́тельницꙋ за на́съ, грѣ́шныхъ, и҆ покланѧ́емсѧ тебѣ̀, ѡ҆ на́съ молѧ́щейсѧ: вѣ́рꙋемъ бо и҆ ᲂу҆пова́емъ, ꙗ҆́кѡ и҆спро́сиши ᲂу҆ сн҃а твоегѡ̀ и҆ бг҃а бл҃га́ѧ вре́меннаѧ и҆ вѣ́чнаѧ всѣ́мъ, съ любо́вїю вопїю́щымъ тѝ си́це:

Ра́дꙋйсѧ, всѣ́хъ навѣ́тѡвъ и҆ и҆скꙋше́нїй, ѿ мі́ра, пло́ти и҆ дїа́вола находѧ́щихъ, попра́нїе: ра́дꙋйсѧ, неча́емое примире́нїе ѡ҆жесточе́ннѡ враждꙋ́ющихъ.

Ра́дꙋйсѧ, недовѣ́домое и҆справле́нїе нераска́ѧнныхъ грѣ́шникѡвъ: ра́дꙋйсѧ, и҆знемога́ющихъ ѿ ᲂу҆ны́нїѧ и҆ печа́ли ско́раѧ ᲂу҆тѣ́шительнице.

Ра́дꙋйсѧ, бл҃года́тїю смире́нїѧ и҆ терпѣ́нїѧ на́съ снабдѣва́ющаѧ: ра́дꙋйсѧ, клѧтвопрестꙋпле́нїй и҆ непра́ведныхъ стѧжа́нїй всенаро́дное ѡ҆бличе́нїе.

Ра́дꙋйсѧ, ѿ дома́шнїѧ бра́ни и҆ вражды̀ є҆динокро́вныѧ ми́ромъ и҆ любо́вїю ѡ҆гражда́ющаѧ: ра́дꙋйсѧ, ѿ па́гꙋбныхъ начина́нїй и҆ несмы́сленныхъ пожела́нїй на́съ незри́мѡ ѿвраща́ющаѧ.

Ра́дꙋйсѧ, во бл҃ги́хъ намѣ́ренїихъ на́шихъ при́снаѧ споспѣ́шнице: ра́дꙋйсѧ, въ ча́съ кончи́ны всѣ̑мъ на́мъ помо́щнице.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ г҃і.

Ѽ, всепѣ́таѧ мт҃и, невмѣсти́магѡ бг҃а во чре́вѣ вмѣсти́вшаѧ и҆ ра́дость всемꙋ̀ мі́рꙋ роди́вшаѧ. Ны́нѣшнее прїимѝ пѣ́нїе, всѧ̑ на́шѧ печа́ли на ра́дость преложѝ и҆ ѿ всѧ́кїѧ и҆зба́ви напа́сти всѣ́хъ и҆ бꙋ́дꙋщыѧ и҆змѝ мꙋ́ки, ѡ҆ тебѣ̀ вопїю́щихъ: А҆ллилꙋ́їа.

І҆́косъ а҃.

Ра́дꙋйсѧ, предста́тельствомъ твои́мъ ве́сь мі́ръ сп҃са́ющаѧ: ра́дꙋйсѧ, всѧ̑ на́шѧ печа̑ли ᲂу҆толѧ́ющаѧ.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Конда́къ а҃.

Ра́дꙋйсѧ, неча́ѧннꙋю ра́дость вѣ́рнымъ да́рꙋющаѧ.

Мл҃тва.

Ѽ, прест҃а́ѧ дв҃о, всебл҃га́гѡ сн҃а мт҃и всебл҃га́ѧ, гра́да москвы̀ покрови́тельнице, всѣ́хъ сꙋ́щихъ во грѣсѣ́хъ, ско́рбехъ, бѣда́хъ и҆ болѣ́знехъ вѣ́рнаѧ предста́тельнице и҆ застꙋ́пнице. Прїимѝ моле́бное пѣ́нїе сїѐ ѿ на́съ, недосто́йныхъ ра̑бъ твои́хъ, тебѣ̀ возноси́мое, и҆ ꙗ҆́коже дре́влѣ грѣ́шника, на всѧ́къ де́нь мно́гажды пред̾ чтⷭ҇но́ю і҆кѡ́ною твое́ю моли́вшагосѧ, не презрѣ́ла є҆сѝ, но дарова́ла є҆сѝ є҆мꙋ̀ неча́ѧннꙋю ра́дость покаѧ́нїѧ и҆ преклони́ла є҆сѝ сн҃а твоего̀ мно́гимъ и҆ ᲂу҆се́рднымъ къ немꙋ̀ хода́тайствомъ ко проще́нїю сего̀ грѣ́шнагѡ и҆ заблꙋ́ждшагѡсѧ, та́кѡ и҆ ны́нѣ не пре́зри моле́нїѧ на́съ, недосто́йныхъ рабѡ́въ твои́хъ, и҆ ᲂу҆молѝ сн҃а твоегѡ̀ и҆ бг҃а на́шегѡ, да и҆ всѣ́мъ на́мъ, съ вѣ́рою и҆ ᲂу҆миле́нїемъ покланѧ́ющымсѧ пред̾ цѣльбоно́снымъ ѻ҆́бразомъ твои́мъ, да́рꙋетъ неча́ѧннꙋю по коего́ждо потре́бѣ ра́дость: грѣ́шникѡмъ, погрѧ́зшымъ во глꙋбинѣ̀ ѕѡ́лъ и҆ страсте́й, вседѣ́йственное вразꙋмле́нїе, покаѧ́нїе и҆ сп҃се́нїе: сꙋ́щымъ въ ско́рбехъ и҆ печа́лехъ ᲂу҆тѣше́нїе: ѡ҆брѣта́ющымсѧ въ бѣда́хъ и҆ ѡ҆ѕлобле́нїихъ соверше́нное си́хъ и҆збы́тїе: малодꙋ́шнымъ и҆ ненаде́жднымъ наде́ждꙋ и҆ терпѣ́нїе: въ ра́дости и҆ и҆з̾ѡби́лїи живꙋ́щымъ непреста́нное благодѣ́телю бг҃ꙋ бл҃годаре́нїе: бѣ́дствꙋющымъ млⷭ҇рдїе: сꙋ́щымъ въ болѣ́зни и҆ долгонедꙋ́жїи и҆ ѡ҆ста́вленнымъ врача́ми неча́емое и҆сцѣле́нїе и҆ ᲂу҆крѣпле́нїе: и҆жди́вшымъ ѿ недꙋ́га ᲂу҆́мъ ᲂу҆ма̀ возвраще́нїе и҆ ѡ҆бновле́нїе: ѿходѧ́щымъ въ вѣ́чнꙋю и҆ несконча́емꙋю жи́знь па́мѧть сме́ртнꙋю, ᲂу҆миле́нїе и҆ сокрꙋше́нїе ѡ҆ грѣсѣ́хъ, дꙋ́хъ бо́дръ и҆ тве́рдꙋю на млⷭ҇рдїе сꙋдїѝ наде́ждꙋ. Ѽ, гпⷭ҇жѐ прест҃а́ѧ! Оу҆млⷭ҇рдисѧ ѡ҆ всѣ́хъ чтꙋ́щихъ всечтⷭ҇но́е и҆́мѧ твоѐ и҆ всѣ́мъ ꙗ҆вѝ всемо́щный покро́въ тво́й и҆ застꙋпле́нїе: во бл҃гоче́стїи, чⷭ҇тотѣ̀ и҆ чтⷭ҇нѣ́мъ жи́тельствѣ пребыва́ющыѧ до сконча́нїѧ и҆̀хъ во бл҃гости соблюдѝ: ѕлы́ѧ бл҃ги сотворѝ: заблꙋ́ждшыѧ на пꙋ́ть пра́вый наста́ви: всѧ́комꙋ дѣ́лꙋ бл҃го́мꙋ и҆ сн҃ꙋ твоемꙋ̀ ᲂу҆го́дномꙋ споспѣшествꙋ́й: всѧ́кое дѣ́ло ѕло́е и҆ бг҃опроти́вное разрꙋшѝ: въ недоꙋмѣ́нїи и҆ трꙋ́дныхъ и҆ ѡ҆па́сныхъ ѡ҆бстоѧ́нїихъ ѡ҆брѣта́ющымсѧ незри́мꙋю по́мощь и҆ вразꙋмле́нїе съ нб҃сѐ низпослѝ, ѿ и҆скꙋше́нїй, собла́знѡвъ и҆ поги́бели сп҃сѝ, ѿ всѣ́хъ ѕлы́хъ человѣ̑къ и҆ ѿ врагѡ́въ ви́димыхъ и҆ неви́димыхъ защитѝ и҆ сохранѝ: пла́вающымъ спла́вай, пꙋтеше́ствꙋющымъ спꙋтеше́ствꙋй: сꙋ́щымъ въ нꙋ́ждѣ и҆ гла́дѣ бꙋ́ди пита́тельница: неимꙋ́щымъ кро́ва и҆ приста́нища бꙋ́ди покро́въ и҆ прибѣ́жище: наги́мъ пода́ждь ѡ҆дѣѧ́нїе: ѡ҆би̑димымъ и҆ непра́веднѡ гони̑мымъ застꙋпле́нїе: клеветꙋ̀, поноше́нїе и҆ хꙋле́нїе терпѧ́щыѧ незри́мѡ ѡ҆правда́й: клеветникѝ и҆ хꙋли́тели пред̾ всѣ́ми ѡ҆бличѝ: ѡ҆жесточе́ннѡ враждꙋ́ющымъ неча́емое пода́ждь примире́нїе и҆ всѣ́мъ на́мъ дрꙋ́гъ ко дрꙋ́гꙋ любо́вь, ми́ръ, и҆ бл҃гоче́стїе, и҆ здра́вїе съ долгоде́нствїемъ. Сꙋпрꙋ́жества въ любвѝ и҆ є҆диномы́слїи сохранѝ: сꙋпрꙋ́ги, во враждѣ̀ и҆ раздѣле́нїи сꙋ́щыѧ, ᲂу҆мирѝ, соединѝ ѧ҆̀ дрꙋ́гъ ко дрꙋ́гꙋ и҆ положѝ и҆́мъ сою́зъ любвѐ неразрꙋши́мый: ма́теремъ дѣтородѧ́щымъ ско́рое пода́ждь разрѣше́нїе, младє́нцы воспита́й, ю҆́ныѧ ᲂу҆цѣломꙋ́дри, ѿве́рзи и҆́мъ ᲂу҆́мъ къ воспрїѧ́тїю всѧ́кагѡ поле́знагѡ ᲂу҆че́нїѧ, стра́хꙋ бж҃їю, воздержа́нїю и҆ трꙋдолю́бїю наста́ви: ѿ дома́шнїѧ бра́ни и҆ вражды̀ є҆динокрѡ́вныѧ ми́ромъ и҆ любо́вїю ѡ҆градѝ: безма́тернихъ сирѡ́тъ бꙋ́ди мт҃рь, ѿ всѧ́кагѡ поро́ка и҆ скве́рны ѿвратѝ ѧ҆̀ и҆ всемꙋ̀ бл҃го́мꙋ и҆ бг҃оꙋго́дномꙋ наꙋчѝ, прельщє́нныѧ же и҆ во грѣ́хъ и҆ нечистотꙋ̀ впа́дшыѧ, скве́рнꙋ грѣха̀ ѿ̾ѧ́вши, и҆з̾ бе́здны поги́бели и҆зведѝ: вдѡ́въ бꙋ́ди ᲂу҆тѣ́шительница и҆ помо́щница, ста́рости бꙋ́ди же́злъ: ѿ внеза́пныѧ сме́рти без̾ покаѧ́нїѧ всѣ́хъ на́съ и҆зба́ви и҆ всѣ́мъ на́мъ хрⷭ҇тїа́нскꙋю кончи́нꙋ живота̀ на́шегѡ, безболѣ́зненнꙋ, непосты́днꙋ, ми́рнꙋ и҆ до́брый ѿвѣ́тъ на стра́шнѣмъ сꙋди́щи хрⷭ҇то́вѣ да́рꙋй: преста́вльшыѧсѧ въ вѣ́рѣ и҆ покаѧ́нїи ѿ житїѧ̀ сегѡ̀ со а҆́гг҃лы и҆ всѣ́ми ст҃ы́ми жи́ти сотворѝ: сконча́вшымсѧ внеза́пною сме́ртїю млⷭ҇тива бы́ти сн҃а твоегѡ̀ ᲂу҆молѝ и҆ ѡ҆ всѣ́хъ ᲂу҆со́пшихъ, и҆́же не и҆́мꙋтъ сро́дникѡвъ, ѡ҆ ᲂу҆покое́нїи и҆̀хъ сн҃а твоегѡ̀ ᲂу҆молѧ́ющихъ, сама̀ бꙋ́ди непреста́ннаѧ и҆ те́плаѧ мл҃твенница и҆ хода́таица: да всѝ на нб҃сѝ и҆ на землѝ вѣ́дѧтъ тѧ̀, ꙗ҆́кѡ тве́рдꙋю и҆ непосты́днꙋю предста́тельницꙋ ро́да хрⷭ҇тїа́нскагѡ и҆, вѣ́дꙋще, сла́вѧтъ тѧ̀ и҆ тобо́ю сн҃а твоегѡ̀, со безнача́льнымъ є҆гѡ̀ ѻ҆ц҃е́мъ и҆ є҆диносꙋ́щнымъ є҆гѡ̀ дх҃омъ, ны́нѣ, и҆ при́снѡ, и҆ во вѣ́ки вѣкѡ́въ. А҆ми́нь.

Акафист Пресвятой Богородице пред иконой «Нечаянная Радость»

Аудио:

32:41

Кондак 1

Избра́нней от всех родо́в Божией Матери и Цари́це, яви́вшейся иногда́ к челове́ку беззако́нну, во е́же отврати́ти его́ от пути́ нече́стия, благода́рственное пе́ние прино́сим Ти, Богороди́тельнице; Ты же, я́ко иму́щая милосе́рдие неизрече́нное, от вся́ких нас бед и грехо́в свободи́, да зове́м Ти:

Ра́дуйся, неча́янную ра́дость ве́рным да́рующая.

Икос 1

А́нгели и пра́ведных ду́ши удиви́шася, егда́ предста́ла еси́ пред Сы́ном Твои́м и Бо́гом и мно́гим моле́нием хода́тайствовала еси́ о челове́це, при́сно во гресе́х пребыва́ющем; мы же, очи́ма ве́ры толи́кое Твое́ благоутро́бие зря́ще, со умиле́нием взыва́ем Ти си́це:

Ра́дуйся, моли́твы всех христиа́н прие́млющая;
ра́дуйся, и са́мых отча́янных гре́шников моле́ния не отверга́ющая.

Ра́дуйся, к Сы́ну Твоему́ о них предста́тельствующая;
ра́дуйся, неча́янную ра́дость спасе́ния им подаю́щая.

Ра́дуйся, предста́тельством Твои́м весь мир спаса́ющая;
ра́дуйся, вся на́ша печа́ли утоля́ющая.

Ра́дуйся, Ма́ти всех Бо́га, озло́бленных ду́ши утеша́ющая;
ра́дуйся, житие́ на́ше до́бре устроя́ющая.

Ра́дуйся, избавле́ние от грехо́в всем челове́ком прине́сшая;
ра́дуйся, Ра́дость всему́ ми́ру роди́вшая.

Ра́дуйся, неча́янную ра́дость ве́рным да́рующая.

Кондак 2

Ви́дящи Пресвята́я челове́ка, а́ще и беззако́нна, но на всяк день с ве́рою и упова́нием пред честно́ю Ея́ ико́ною до́лу поверга́ющагося и Арха́нгельское приве́тствие Ей принося́щаго, внят и такова́го гре́шника славосло́вию, да вси, зря́ще Ея́ Ма́тернее милосе́рдие, на Небеси́ и на земли́ вопию́т Бо́гу: Аллилу́иа.

Икос 2

Ра́зум челове́ческий вои́стину превосхо́дит любо́вь Твоя́ к ро́ду христиа́нскому, я́ко и тогда́ не преста́ла еси́ от хода́тайства Твоего́ о челове́це беззако́нном, егда́ Сын Твой показа́ Тебе́ я́звы гвозди́ныя, грехи́ челове́ческими Ему́ соде́янныя. Зря́ще Тя толи́ко неотсту́пную Предста́тельницу за нас, гре́шных, со слеза́ми вопие́м Ти:

Ра́дуйся, Засту́пнице усе́рдная ро́да христиа́нскаго, от Бо́га нам дарова́нная;
ра́дуйся, Путеводи́тельнице на́ша, к Небе́сному Оте́честву нас возводя́щая.

Ра́дуйся, ве́рных огражде́ние и прибе́жище;
ра́дуйся, по́моще всех, призыва́ющих и́мя Твое́ свято́е.

Ра́дуйся, все́ми презре́нных и отве́рженных от ро́ва поги́бели исхища́ющая;
ра́дуйся, тех на путь пра́вый обраща́ющая.

Ра́дуйся, непреста́нное уны́ние и мрак душе́вный отгоня́ющая;
ра́дуйся, ижди́вшим от неду́га ум но́вый и лу́чший смысл подаю́щая.

Ра́дуйся, оста́вленных врача́ми на Своя́ всемо́щныя ру́це прие́млющая.

Ра́дуйся, неча́янную ра́дость ве́рным да́рующая.

Кондак 3

Си́ла благода́ти преизоби́ловала та́мо, иде́же умно́жися грех; да ра́дуются на Небеси́ вси А́нгели о еди́нем гре́шнице пока́явшемся, пою́ще пред Престо́лом Бо́жиим: Аллилу́иа.

Икос 3

Иму́щи к ро́ду христиа́нскому Ма́тернее милосе́рдие, всем с ве́рою и упова́нием прибега́ющим к Тебе́ подае́ши ру́ку по́мощи, Влады́чице, да вси еди́нем се́рдцем и един́ыми усты́ славосло́вие прино́сят Ти сицево́е:

Ра́дуйся, я́ко Тобо́ю к нам нисхо́дит Бо́жие благоволе́ние;
ра́дуйся, я́ко Тобо́ю и мы и́мамы вя́щшее к Бо́гу дерзнове́ние.

Ра́дуйся, я́ко во всех беда́х и обстоя́ниих на́ших прино́сиши Сы́ну Твоему́ усе́рдныя о нас моли́твы;
ра́дуйся, я́ко и на́ша моли́твы прия́тными Бо́гу соде́лываеши.

Ра́дуйся, я́ко неви́димых враго́в от нас отгоня́еши;
ра́дуйся, я́ко от ви́димых враго́в нас избавля́еши.

Ра́дуйся, я́ко сердца́ злых челове́к умягча́еши;
ра́дуйся, я́ко от клеветы́, досажде́ния и укоре́ния нас изыма́еши.

Ра́дуйся, я́ко Тобо́ю вся блага́я жела́ния на́ша исполня́ются;
ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом.

Ра́дуйся, неча́янную ра́дость ве́рным да́рующая.

Кондак 4

Бу́рю внутрь име́я грехо́вных помышле́ний, челове́к беззако́нен моля́шеся пред честно́ю ико́ною Твое́ю и, ви́дев Кровь от язв Предве́чнаго Сы́на Твоего́ пото́ками, я́коже на Кресте́, теку́щую, паде́ от стра́ха и с рыда́нием та́ко вопия́ше Ти: «Поми́луй мя, о, Ма́ти милосе́рдия, да не преодоле́ет зло́ба моя́ неизре́ченныя бла́гости и милосе́рдия Твоего́, Ты бо еси́ всем гре́шником еди́на наде́жда и прибе́жище; преклони́ся у́бо на ми́лость, Блага́я Ма́ти, и умоли́ о мне Сы́на Твоего́ и Творца́ моего́, да непреста́нно зову́ Ему́: Аллилу́иа».

Икос 4

Слы́шавше небожи́тели о чуде́снем моли́твами Твои́ми спасе́нии их земна́го ги́бнущаго бра́та, просла́виша Тя, благосе́рдую Цари́цу Небесе́ и земли́; и мы, гре́шнии, све́давше таково́е подо́бнаго нам гре́шника заступле́ние, а́ще и недоумева́ет язы́к наш восхвали́ти Тя по достоя́нию, от глубины́ умиле́ннаго сердца́ на́шего воспева́ем Ти си́це:

Ра́дуйся, Спору́чнице спасе́ния гре́шных;
ра́дуйся, Взыска́ние поги́бших.

Ра́дуйся, Неча́янная гре́шных Ра́досте;
ра́дуйся, па́дших возста́ние.

Ра́дуйся, Предста́тельнице к Бо́гу, мир от бед спаса́ющая;
ра́дуйся, я́ко гла́са моли́тв Твои́х бе́си трепе́щут.

Ра́дуйся, я́ко А́нгели сему́ ра́дуются;
ра́дуйся, я́ко и нас, земноро́дных, си́ла моли́тв Твои́х весе́лия исполня́ет.

Ра́дуйся, я́ко те́ми от ти́ны грехо́в нас изыма́еши;
ра́дуйся, я́ко пла́мень страсте́й на́ших угаша́еши.

Ра́дуйся, неча́янную ра́дость ве́рным да́рующая.

Кондак 5

Боготе́чную звезду́, чудотво́рную ико́ну Ма́тере Твоея́ показа́л еси́ нам, Го́споди, и́бо, взира́юще на о́браз Ея́ теле́сныма очи́ма, умо́м и се́рдцем к Первообра́зней возвыша́емся и Е́ю к Тебе́ востека́ем, пою́ще: Аллилу́иа.

Икос 5

Ви́девше А́нгели Храни́тели христиа́н, я́ко Бо́жия Ма́терь споспешеству́ет им в наставле́нии тех, заступле́нии и спасе́нии, потща́шася си́це возопи́ти Честне́йшей Херуви́м и Сла́внейшей без сравне́ния Серафи́м:

Ра́дуйся, с Сы́ном Твои́м и Бо́гом вечно ца́рствующая;
ра́дуйся, Ему́ всегда́ о ро́де христиа́нстем моле́ния принося́щая.

Ра́дуйся, в христиа́нстей ве́ре и благоче́стии Наста́внице;
ра́дуйся, ересе́й и тлетво́рных раско́лов Искорени́тельнице.

Ра́дуйся, от растлева́ющих ду́шу и те́ло собла́знов сохраня́ющая;
ра́дуйся, от опа́сных обстоя́ний и внеза́пныя сме́рти без покая́ния и Свята́го Причаще́ния избавля́ющая.

Ра́дуйся, упова́ющим на Тя живота́ непосты́дный коне́ц да́рующая;
ра́дуйся, и по сме́рти за отше́дшую на суд Госпо́день ду́шу пред Сы́ном Твои́м неотсту́пно хода́тайствующая.

Ра́дуйся, Твои́м Ма́терним предста́тельством от ве́чнаго муче́ния сию́ избавля́ющая.

Ра́дуйся, неча́янную ра́дость ве́рным да́рующая.

Кондак 6

Пропове́дник чу́днаго Твоего́ милосе́рдия, дарова́ннаго не́коему челове́ку беззако́нну, яви́ся святы́й Дими́трий Росто́вский, и́же, спису́я вели́кая и сла́вная, и изря́дная де́ла Бо́жия, в Тебе́ явле́нная, предаде́ пи́сьмени и сие́ де́ло ми́лости Твоея́ в науче́ние и утеше́ние всем ве́рным, да и ти́и, во гресе́х, беда́х, ско́рбех и озлобле́ниих су́ще, мно́гажды на всяк день с ве́рою в моли́тве пред о́бразом Твои́м коле́на преклоня́ют и, тех избы́вше, вопию́т Бо́гу: Аллилу́иа.

Икос 6

Возсия́ нам, я́ко пресве́тлая заря́, чудотво́рная ико́на Твоя́, Богома́ти, прогоня́я тьму бед и скорбе́й от всех, с любо́вию вопию́щих Ти си́це:

Ра́дуйся, Цели́тельнице на́ша в боле́знех теле́сных;
ра́дуйся, Блага́я Уте́шительнице в печа́лех на́ших душе́вных.

Ра́дуйся, скорбь на́шу в ра́дость претворя́ющая;
ра́дуйся, ненаде́ющихся несумне́нною наде́ждою возвеселя́ющая.

Ра́дуйся, а́лчущих Пита́тельнице;
ра́дуйся, наги́х одея́ние.

Ра́дуйся, вдов Уте́шительнице;
ра́дуйся, безма́терних сиро́т незри́мая Воспита́тельнице.

Ра́дуйся, непра́ведно гони́мых и оби́димых Засту́пнице;
ра́дуйся, гоня́щих и оби́дящих правосу́дная отмсти́тельнице.

Ра́дуйся, неча́янную ра́дость ве́рным да́рующая.

Кондак 7

Хотя́ Законода́вец Правосу́дный Госпо́дь Сам бы́ти зако́на Исполни́тель и яви́ти милосе́рдия Своего́ бе́здну, преклони́ся на усе́рдное моле́ние Твое́, Преблагослове́нная Ма́ти Де́во, о челове́це беззако́нне, глаго́ля: «Зако́н повелева́ет, да сын чтит ма́терь. Аз Сын Твой, Ты же Ма́ти Моя́: Аз Тя до́лжен чти́ти, послу́шая Твоего́ моле́ния; бу́ди у́бо, я́коже хо́щеши: ны́не проща́ются ему́ греси́ Тебе́ ра́ди». Мы же, ви́дяще такову́ю си́лу моли́твы Хода́таицы на́шей о проще́нии согреше́ний на́ших, просла́вим милосе́рдие и неизрече́нное благоутро́бие Ея́, зову́ще: Аллилу́иа.

Икос 7

Но́вое ди́вное и сла́вное зна́мение всем ве́рным яви́ся, я́ко не то́кмо Матери Твое́й, но и пречи́стому Ея́ ли́ку, на дске изображе́нному, си́лу чудотворе́ния дарова́л еси́, Го́споди; сему́ та́инству дивя́щеся, во умиле́нии сердца́ вопие́м к Ней такова́я:

Ра́дуйся, прему́дрости и бла́гости Бо́жия открове́ние;
ра́дуйся, ве́ры утвержде́ние.

Ра́дуйся, благода́ти явле́ние;
ра́дуйся, душеполе́зных зна́ний дарова́ние.

Ра́дуйся, душевре́дных уче́ний низложе́ние;
ра́дуйся, беззако́нных на́выков нетру́дное преодоле́ние.

Ра́дуйся, сло́во прему́дрости прося́щим да́рующая;
ра́дуйся, несмы́сленныя разу́мныя соде́ловающая.

Ра́дуйся, де́тем, неудо́бь уча́щимся, ра́зум подаю́щая;
ра́дуйся, ю́ности блага́я Охрани́тельнице и Наста́внице.

Ра́дуйся, неча́янную ра́дость ве́рным да́рующая.

Кондак 8

Стра́нное и ужа́сное виде́ние бысть не́коему челове́ку беззако́нну, показу́я ему́ бла́гость Госпо́дню, предста́тельством Богома́тере грехи́ его́ проща́ющую; сего́ ра́ди отто́ле, испра́вль свое́ житие́, поживе́ богоуго́дне. Си́це и мы, сла́вная дела́ и многоразли́чную прему́дрость Бо́жию в ми́ре и жи́зни на́шей ви́дяще, устрани́мся земны́я суеты́ и изли́шних жите́йских попече́ний и ум и се́рдце на́ше на Небеса́ возведе́м, пою́ще Бо́гу: Аллилу́иа.

Икос 8

Вся в вы́шних пребыва́ющи, и ни́жних ника́коже отступи́ла еси́, Премилосе́рдая Цари́це Небесе́ и земли́; а́ще бо по Успе́нии Твое́м и взошла́ еси́ на Небеса́ с Пречи́стою Твое́ю пло́тию, оба́че и гре́шныя земли́ не оста́вила еси́, явля́ющися Прича́стница Промышле́ния Сы́на Твоего́ о ро́де христиа́нстем. Сего́ ра́ди Тя по до́лгу ублажа́ем:

Ра́дуйся, сия́нием пречи́стыя души́ Твоея́ всю зе́млю просвети́вшая;
ра́дуйся, чистото́ю телесе́ Твоего́ вся Небеса́ возвесели́вшая.

Ра́дуйся, Промышле́ния Сы́на Твоего́ о ро́де христиа́нстем Свята́я Служи́тельнице;
ра́дуйся, о всем ми́ре усе́рдная Предста́тельнице.

Ра́дуйся, всех нас при Кресте́ Сы́на Твоего́ усынови́вшая;
ра́дуйся, всегда́ Ма́тернюю любо́вь к нам явля́ющая.

Ра́дуйся, всех даро́в, духо́вных и теле́сных, незави́стная Пода́тельнице;
ра́дуйся, благ вре́менных Хода́таице.

Ра́дуйся, две́ри Ца́рствия Христо́ва ве́рным отверза́ющая;
ра́дуйся, и на земли́ чи́стаго весе́лия сердца́ их исполня́ющая.

Ра́дуйся, неча́янную ра́дость ве́рным да́рующая.

Кондак 9

Вся́кое естество́ а́нгельское удиви́ся де́лу Твоего́ милосе́рдия, Го́споди, я́ко дарова́л еси́ толи́ко твердую и те́плую Засту́пницу и Помо́щницу ро́ду христиа́нскому, нам неви́димо спребыва́ющу, слы́шащу же Тебе́ пою́щих: Аллилу́иа.

Икос 9

Вити́и многовеща́ннии, но не богопросве́щеннии, суесло́вят, я́ко поклоне́ние свято́му о́бразу а́ки бы поклонение и́долу есть; не разуме́ют бо, я́ко честь, свято́му о́бразу воздава́емая, на Первообра́зная восхо́дит. Мы же не то́кмо сия́ до́бре ве́дуще, но и от ве́рных челове́к о мно́гих чудотворе́ниих от ли́ка Богома́тере слы́шаще, и са́ми поклоне́нием ему́ потре́бная ко вре́менней и ве́чней жи́зни прие́млюще, с весе́лием Богоро́дице взыва́ем:

Ра́дуйся, я́ко от свяще́ннаго ли́ка Твоего́ чудеса́ де́ются;
ра́дуйся, я́ко утаи́ся прему́дрость и благода́ть сия́ от му́дрых и разу́мных ве́ка сего́.

Ра́дуйся, я́ко откры́ся та младе́нцем в ве́ре;
ра́дуйся, я́ко прославля́ющих Тя прославля́еши.

Ра́дуйся, я́ко отверга́ющих Тя пред все́ми посрамля́еши;
ра́дуйся, я́ко от потопле́ния, огня́ и меча́, от смертоно́сныя я́звы и от вся́каго зла прибега́ющих к Тебе́ избавля́еши.

Ра́дуйся, я́ко вся боле́зни челове́честии, душе́вныя и теле́сныя, ми́лостивно врачу́еши;
ра́дуйся, я́ко пра́ведный гнев Бо́жий на нас Твои́м моле́нием ско́ро утоля́еши.

Ра́дуйся, я́ко Ты еси́ ти́хое приста́нище от бурь пла́вающим по мо́рю жите́йскому;
ра́дуйся, я́ко и по конце́ жите́йскаго пла́вания на́шего наде́жно приво́диши нас в необурева́емую страну́ Ца́рствия Христо́ва.

Ра́дуйся, неча́янную ра́дость ве́рным да́рующая.

Кондак 10

Спасти́ хотя́ челове́ка не́коего беззако́нна от заблужде́ния жи́зненнаго пути́ его́, ди́вное виде́ние от пречестны́я ико́ны Твоея́ показа́ла еси́ ему́, Преблагослове́нная, да, чу́до ви́дя, пока́ется и, из глубины́ грехо́вныя милосе́рдым промышле́нием Твои́м воздви́гнутый, вопие́т Бо́гу: Аллилу́иа.

Икос 10

Стена́ еси́ де́вам, Богоро́дице Де́во, и всем к Тебе́ притека́ющим, и́бо Небесе́ и земли́ Творе́ц, всели́выйся во утро́бу Твою́ и от Тебе́ роди́выйся, яви́ Тя, Присноде́ву, стра́жа де́вства, чистоты́ и целому́дрия и сосу́д вся́кия доброде́тели и всех возглаша́ти Тебе́ научи́:

Ра́дуйся, сто́лпе и огражде́ние де́вства;
ра́дуйся, чистоты́ и целому́дрия незри́мая Охрани́тельнице.

Ра́дуйся, до́брая де́вам Наста́внице;
ра́дуйся, неве́ст блага́я Украси́тельнице и Спору́чнице.

Ра́дуйся, всежела́нное соверше́ние благи́х супру́жеств;
ра́дуйся, матере́й детородя́щих ско́рое разреше́ние.

Ра́дуйся, младе́нцев воспита́ние и благода́тное охране́ние;
ра́дуйся, безча́дных роди́телей плода́ми ве́ры и Ду́ха веселя́щая.

Ра́дуйся, матере́й скорбя́щих утеше́ние;
ра́дуйся, та́йное весе́лие чи́стых дев и вдови́ц.

Ра́дуйся, неча́янную ра́дость ве́рным да́рующая.

Кондак 11

Пе́ние всеумиле́нное принося́ще Ти, недосто́йнии, про́сим Тебе́, Де́во Богоро́дице: не пре́зри гла́са рабо́в Твои́х, к Тебе́ бо в напа́стех и ско́рбех прибега́ем и пред Тобо́ю в беда́х на́ших сле́зы пролива́ем, пою́ще: Аллилу́иа.

Икос 11

Светопода́тельную свещу́, су́щим во тьме греха́ и юдо́ли пла́ча яви́вшуюся, зрим Святу́ю Де́ву; духо́вный бо огнь моли́тв Свои́х, наставле́ния и утеше́ния возжига́ющи, приво́дит к Све́ту Невече́рнему всех, воззва́нии почита́ющих Ю си́ми:

Ра́дуйся, Луче́ от Со́лнца Пра́вды, Христа́ Бо́га на́шего;
ра́дуйся, нечи́стую со́весть просвеща́ющая.

Ра́дуйся, та́йная и неудо́бь предви́денная вся до́бре ве́дущая и и́мже подоба́ет сказу́ющая;
ра́дуйся, лжи́вых прови́дцев и су́етная гада́ния посрамля́ющая.

Ра́дуйся, в час недоуме́ний мысль бла́гу на се́рдце полага́ющая;
ра́дуйся, в посте́, моли́тве и богомы́слии пребыва́ющим при́сно спребыва́ющая.

Ра́дуйся, ве́рных па́стырей Це́ркве ободря́ющая и вразумляющая;
ра́дуйся, богобоя́зненных и́ноков и и́нокинь при́сное утеше́ние.

Ра́дуйся, ка́ющихся пред Бо́гом гре́шников непосты́дная Засту́пнице;
ра́дуйся, всех христиа́н те́плая Хода́таице.

Ра́дуйся, неча́янную ра́дость ве́рным да́рующая.

Кондак 12

Благода́ть Боже́ственную испроси́ нам у Сы́на Твоего́ и Бо́га, простри́ нам ру́ку по́мощи, отжени́ от нас вся́каго врага́ и супоста́та, умири́ на́шу жизнь, да не поги́бнем лю́те, без покая́ния, но приими́ нас в ве́чныя кро́вы, Богороди́тельнице, да ра́дующеся пое́м Бо́гу, Тобо́ю нас спаса́ющему: Аллилу́иа.

Икос 12

Пою́ще неизрече́нное Ма́тернее Твое́ милосе́рдие к челове́ку беззако́нну, восхваля́ем Тя вси, я́ко тве́рдую Предста́тельницу за нас, гре́шных, и поклоня́емся Тебе́, о нас моля́щейся; ве́руем бо и упова́ем, я́ко испро́сиши у Сы́на Твоего́ и Бо́га блага́я вре́менная и ве́чная всем, с любо́вию вопию́щим Ти си́це:

Ра́дуйся, всех наве́тов и искуше́ний, от ми́ра, пло́ти и диа́вола находя́щих, попра́ние;
ра́дуйся, неча́емое примире́ние ожесточе́нно вражду́ющих.

Ра́дуйся, недове́домое исправле́ние нераска́янных гре́шников;
ра́дуйся, изнемога́ющих от уны́ния и печа́ли ско́рая Уте́шительнице.

Ра́дуйся, благода́тию смире́ния и терпе́ния нас снабдева́ющая;
ра́дуйся, клятвопреступле́ний и непра́ведных стяжа́ний всенаро́дное обличе́ние.

Ра́дуйся, от дома́шния бра́ни и вражды́ единокро́вныя ми́ром и любо́вию огражда́ющая;
ра́дуйся, от па́губных начина́ний и несмы́сленных пожела́ний нас незри́мо отвраща́ющая.

Ра́дуйся, во благи́х наме́рениих на́ших при́сная Споспе́шнице;
ра́дуйся, в час кончи́ны всем нам Помо́щнице.

Ра́дуйся, неча́янную ра́дость ве́рным да́рующая.

Кондак 13

О, Всепе́тая Ма́ти, Невмести́маго Бо́га во чре́ве вмести́вшая и Ра́дость всему́ ми́ру роди́вшая! Ны́нешнее приими́ пе́ние, вся на́ша печа́ли на ра́дость преложи́ и от вся́кия изба́ви напа́сти всех и бу́дущия изми́ му́ки, о Тебе́ вопию́щих: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ра́дуйся, к Сы́ну Твоему́ о них предста́тельствующая;
ра́дуйся, неча́янную ра́дость спасе́ния им подаю́щая.

Ра́дуйся, предста́тельством Твои́м весь мир спаса́ющая;
ра́дуйся, вся на́ша печа́ли утоля́ющая.

Ра́дуйся, Ма́ти всех Бо́га, озло́бленных ду́ши утеша́ющая;
ра́дуйся, житие́ на́ше до́бре устроя́ющая.

Ра́дуйся, избавле́ние от грехо́в всем челове́ком прине́сшая;
ра́дуйся, Ра́дость всему́ ми́ру роди́вшая.

Ра́дуйся, неча́янную ра́дость ве́рным да́рующая.